ჯანდაცვის მინისტრის მოადგილე თამარ გაბუნია აცხადებს, რომ კორონავირუსის საეჭვო შემთხვევების ტესტირების კუთხით რიგების ან პასუხების დაგვიანების პრობლემა არაა.

მინისტრის მოადგილის თქმით, ამჟამად მარაგშია 3 000 ტესტი, ასევე შესყიდვის ფაზაშია 20 000-მდე ტესტი.

„დღეს ჩვენ გვაქვს იმის სრული შესაძლებლობა, რომ ყველა საეჭვო შემთხვევა, რომელიც აკმაყოფილებს ჯანმრთელობის მსოფლიო ორგანიზაციის განმარტებას საეჭვო შემთხვევასთან დაკავშირებით, იქნას ტესტირებული. ლაბორატორიების წარმადობას რაც შეეხება, თითოეულ ფილიალს დღე-ღამეში 100 ტესტის შესრულება შეუძლია, ამდენად პრობლემა რომ ან რიგი გვქონდეს ტესტირებასთან დაკავშირებით ან შეფერხდეს პასუხების დაბრუნება, ასეთი რამ დღესდღეობით არ დგას.

პასუხებს ვიღებთ ძალიან სწრაფად -12 საათში. ყველაზე დიდი პერიოდი, რაც შეიძლება დაგვჭირდეს 24 საათია“,-აღნიშნა გაბუნიამ.