"საქართველოს რკინიგზა“ მგზავრთა გადაყვანას ჩვეულ რეჟიმში განაგრძობს. ამის შეასხებ „ინტერპრესნიუსს“ „საქართველოს რკინიგზაში“ განუცხადეს. მათივე განმარტებით, ჯერჯერობით რკინიგზის გაჩერების შესახებ მთავრობის გადაწყვეტილება მიღებული არ არის.

ამასთან, უწყებაში განმარტავენ, რომ ისინი სრულად მოქმედებენ საკოორდინაციო საბჭოს და დაავადებათა კონტროლის ეროვნული ცენტრის რეკომენდამენდაციების შესაბამისად და რკინიგზას დეზინფექციაც უტარდება.

„სახელმწიფოს და საზოგადოებრივი ინტერესების გათვალისწინებით სადეზინფექციო სამუშაოების, დისტანციური მოქმედების ნაწილში სრულად ვმოქმედებთ საკოორდინაციო საბჭოს და დაავადებათა კონტროლის ეროვნული ცენტრის რეკომენდაციების შესაბამისად. მომავალშიც, საქართველოს რკინიგზა მოიქცევა იმის მიხედვით თუ რა მითითება იქნება საქართველოს მთავრობისა და საკორდინაციო საბჭოს მხრიდან.

რაც შეეხება რეისებს, დღეს ყველა რეისი დაგეგმილი გრაფიკით შესრულდა. ჩვეულებრივად გავიდა ყველა მატარებელი და გავა ღამეც. ასევე, თბილისში ყველა ის რეისი დაბრუნდა, რომელიც მაგისტრალურ ხაზზე მოძრაობს“, - განუცხადეს „ინტერპრესნიუსს“ „საქართველოს რკინიგზაში”.