თბილისის ზღვის ჰოსპიტალის კლინიკური დირექტორის, კახა ბეროზაშვილის განცხადებით, კლინიკაში კორონავირუსით ინფიცირებული პაციენტის მდგომარეობა საშუალო სიმძიმისაა.

მისი თქმით, პაციენტს პნევმონია აღენიშნება.

„პაციენტი შემოსულია ჩივილებით: საერთო სისუსტე, ცხელება, ყელის ტკივილი, ჩატარდა კლინიკურ-ლაბორატორიული გამოკვლევები. გამოვიძახეთ ლუგარის ლაბორატორია, ჩატარდა კვლევა და კორონავირუსზე დადებითი პასუხი მივიღეთ. მას შემდეგ ეს პაციენტი სპეციალურ პალატაშია მოთავსებული. მიმდინარეობს მკურნალობა დამტკიცებული გაიდლაინის მიხედვით. ზოგადი მდგომარეობა პაციენტის არის საშუალო სიმძიმის და აღენიშნება პნევმონია.

რაც შეეხება კლინიკის გადაკეთებას ფუნქციურად ე.წ. ცხელების ცენტრად, ეს მოხდა 28 მარტის ბრძანებით. სხვა პაციენტების, ზოგადი სომატური პაციენტების მიღება ჩვენთან შეჩერებულია. ვიღებთ მხოლოდ დაუზუსტებელი ცხელებით პაციენტებს და ხდება მათი გამოკვლევა“,-განაცხადა კახა ბეროზაშვილმა.

ცნობისთვის, თბილისის ზღვის ჰოსპიტალში კორონავირუსის პირველი შემთხვევა გამოვლინდა. ინფიცირებული 50 წლის მამაკაცია,რომელსაც მეზობელ ქვეყანაში მოგზაურობის ისტორია აქვს.