დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, შედარებითი ანალიზი, რომ საქართველო სხვა ქვეყნებს ჩატარებული ტესტების რაოდენობით ჩამოუვარდება, სწორი არ არის. შესაბამის საკითხზე გამყრელიძემ სოციალურ ქსელში, ვიდეოჩართვისას ისაუბრა.

„რაც შეეხება თუ ვის რამდენი ტესტი აქვს ჩატარებული: სხვადასხვა მედიასაშუალებაში იყო გადაცემები, რომ საქართველო ბოლო ადგილზეა თურმე და ა.შ. არ არის ბატონებო ეს სწორი. ამ სახის შედარებითი ანალიზი არ არის სწორი. გეუბნებით კიდევ ერთხელ, როცა ჩვენ ვედრებით გერმანიას, ან გაერთიანებულ სამეფოს, ან შეერთებულ შტატებს ან არ მინდა ახლა დავასახელო ჩვენს ირგვლივ მყოფი ზოგიერთი ქვეყანა... არ არის ეს შედარებები, რაც გამოქვეყნდა PCR ტექნოლოგიებზე დამყარებული ანუ იქ არის ძირითადად გამოკვლეული ადამიანები სწრაფი, ანტიგენზე ან უფრო ხშირად ანტისხეულებზე დამყარებული ტესტებით. თუ ვინმეს კიდევ სურს ამ საკითხზე დისკუსია, მთავარი ჩვენთვის არის, რომ არ იყოს ადამიანი ქვეყანაში, ვისაც ჩვენი ალგორითმით ტესტის ჩატარება სჭირდება და მას ტესტი არ ჩაუტარდეს. აქამდე ასეთი არ ყოფილა,“ - განაცხადა ამირან გამყრელიძემ.