„ევროპული საქართველოს“ წევრის ირაკლი აბესაძის განცხადებით, ვირუსის გავრცელების საფრთხეს ზრდის არა კარანტინში მყოფი პირების მხრიდან დაწესებული შეზღუდვების დარღვევა, არამედ - ხელისუფლების მოქმედება საგანგებო მდგომარეობის ფარგლებში მიღებული კანონის აღსრულებისას. მისივე თქმით, ვირუსის გავრცელების რისკებს ზრდის ასევე მსუბუქი ავტომობილებით გადაადგილების აკრძალვა.

„როდესაც ვსაუბრობთ ვირუსის გავრცელების შესაფერხებლად ჯარიმების შემოღებაზე, კარგად უნდა გვესმოდეს, რომ ამ საფრთხეს რეალურად ქმნის არა კარანტინში მოქცეული ადამიანების მხრიდან ამ რეჟიმის დარღვევა, არამედ თავად ხელისუფლების უპასუხისმგებლო და არათანმიმდევრული მოქმედება უკვე მიღებული კანონის აღსრულებისას. მაგალითად, ხელისუფლება 3000 ლარით აჯარიმებს ერთ მანქანაში მყოფ მეუღლეებს, რიგში მყოფ მამა-შვილს, მაგრამ ამავდროულად, ათასობით ადამიანს აძლევს რელიგიური შეკრების შესაძლებლობას, რაც მართლაც ზრდის ვირუსის ფართოდ გავრცელების რეალურ საფრთხეს. ამავე საფრთხეს ქმნის ის უგუნური და ქაოტური შეზღუდვები, რომელიც ხელისუფლებას შემოაქვს. მაგალითად, მანქანებით გადაადგილების აკრძალვა, როდესაც ადამიანებს იძულებულს ხდიან მეტი დრო გაატარონ ფეხით ქუჩაში, მეტ ადამიანთან ჰქონდეთ შეხება, მეტი დრო გაატარონ უბნის მაღაზიების რიგში იმიტომ, რომ მათი დიდი ნაწილი დაიკეტა ან შეფერხებით მუშაობს სწორედ მანქანების აკრძალვის გამო. ეს მნიშვნელოვნად ამცირებს ქვეყნის ეკონომიკურ შესაძლებლობებს და ადამიანის შესაძლებლობებს, მიიღონ ელემენტარული შემოსავალი იმ პირობებში, როდესაც მათ სახელმწიფო საერთოდ არ ეხმარება“, - განაცხადა აბესაძემ.