თბილისის ბავშვთა ინფექციური საავადმყოფოს დირექტორი მამუკა მაჭავარიანი უარყოფს თანამშრომლების ნაწილის ინფორმაციას, რომ მედპერსონალს ხელფასი იანვრის შემდეგ არ აუღია.

როგორც მაჭავარიანმა „ინტერპრესნიუსს“ განუცხადა, „თანამშრომლებმა ხელფასი მარტის თვეში აიღეს და შესაბამისად, ინფორმაცია თითქოს მათ ხელფასი 5 თვის განმავლობაში არ აუღიათ, არის აბსურდული“.

„გავრცელებულია არასწორი, აბსურდული ინფორმაცია. არ ვიცი, საიდან წამოვიდა ეს წყარო. მათ ხელფასი მიღებული აქვთ მარტის თვის ბოლოს. შესაბამისად, ინფორმაცია თითქოს მათ 5 თვის ხელფასი არ აუღიათ, არის მცდარი. ჩვენ ვართ საყოველთაო პროგრამის მონაწილე კლინიკა, შესაბამისად, ხდება საყოველთაო პროგრამის ფარგლებში შესრულებული სამუშაოს მიხედვით ანაზღაურება და სახელმწიფო განსაზღვრული მეთოდოლოგიის შესაბამისად ახდენს დაფინანსებას,“ - აღნიშნა მამუკა მაჭავარიანმა.

აღსანიშნავია, რომ ბავშვთა ინფექციური საავადმყოფოს თანამშრომლების ნაწილის ინფორმაციით, მათ 5 თვეა - იანვრის კუთვნილი ხელფასი არ აუღიათ.