დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, 22 მაისიდან ბოლნისსა და თელავის მუნიციპალიტეტებში ე.წ. სეროპრევალენტური კვლევა ჩატარდება. მისი თქმით, კვლევა შემთხვევითი შერჩევის პრინციპით 5 დღის განმავლობაში ჩატარდება.

„ზეგიდან, პარასკევიდან ბოლნისისა და თელავის მუნიციპალიტეტებში ვიწყებთ ე.წ. სეროპრევალენტობის კვლევას, რათა დავადგინოთ, როგორია კოვიდინფიცირების გავრცელება მთლიანად ბოლნისის მუნიციპალიტეტში, არა მხოლოდ ორ სოფელში, არამედ მთლიანად მუნიციპალიტეტში. საკონტროლოდ ავიღეთ კახეთის ერთ-ერთი მუნიციპალიტეტი, კერძოდ, თელავი. ერთნაირი მიდგომით, ე.წ. შემთხვევითი შერჩევის პრინციპით 5 დღის განმავლობაში ჩავატარებთ ამ კვლევებს. ამ კვლევებზე იქნება დამოკიდებული, რა დამატებითი ღონისძიებები შეიძლება დაიგეგმოს ბოლნისში“,- განაცხადა გამყრელიძემ.