ბავშვებში არათუ რაიმე გართულება, კოვიდ-19-ის ძალიან მსუბუქი მიმდინარეობაა, - ასე უპასუხა ვახტანგ ბოჭორიშვილის სახელობის კლინიკის სამეთვალყურეო საბჭოს თავმჯდომარემ მაკა სოლოღაშვილმა ჟურნალისტების კითხვას, რომელიც ბავშვებში კავასაკის სინდრომის სავარაუდო საფრთხეს შეეხებოდა.

მისივე თქმით, იმ მოზარდებში, რომლებიც კლინიკაში ამ დროის განმავლობაში მკურნალობდნენ, არანაირი გართულება არ ყოფილა.

„სავარაუდოდ, ყველაზე მეტი მოზარდი ჩვენ გავატარეთ. არ გვქონია ბავშვებში არათუ რაიმე გართულება, ძალიან მსუბუქი მიმდინარეობაა, შემოსვლის პერიოდში თუ გამოიხატება სუბფებრილიტეტი. მიუხედავად იმისა, რომ შესაძლებელია რადიოლოგიური მონაცემებით გამოიხატოს ორმხრივი პნევმონიაც კი, ბავშვები კარგად გრძნობენ თავს და არანაირი სხვა სინდრომის გართულება და გამოხატულება არ გვქონია სახეზე," - განაცხადა მაკა სოლოღაშვილმა.