აშშ-ის პრეზიდენტმა დონალდ ტრამპმა ქვეყანაში მიმდინარე მოვლენებთან დაკავშირებით გუბერნატორებთან ვიდეოკონფერენცია გამართა.

როგორც CNN-ი იუწყება, პრეზიდენტმა გუბერნატორებს მოუწოდა, ძალადობრივი პროტესტის მონაწილეების წინააღმდეგ აგრესიული ტაქტიკა გამოიყენონ.

„მოგიწევთ უპირატესობა მოიპოვოთ. თუკი ვერ დაიმორჩილებთ სიტუაციას, დროს დაკარგავთ. ისინი ცდილობენ გაჯობონ, თქვენ კი იდიოტების ჯგუფს დაემსგავსებით. თქვენ უნდა დააპატიმროთ და გაასამართლოთ ხალხი“, - განუცხადა ტრამპმა გუბერნატორებს.

საუბარს სამართალდამცავი და ეროვნული უშიშროების უწყებების წარმომადგენლებიც ესწრებოდნენ. ტრამპმა აქვე ხაზგასმით აღნიშნა, რომ, მისი აზრით, ძალადობა „რადიკალი მემარცხენეების“ მიერ არის წამოწყებული.

„ეს მოძრაობაა, თუკი მას არ შეამცირებთ, ის სულ უფრო უარესი გახდება. ის წარმატებული მხოლოდ მაშინ არის, როცა თქვენ სუსტები ხართ“, - აღნიშნა შეერთებული შტატების პრეზიდენტმა.

ცნობისთვის, უკვე ერთი კვირაა აშშ-ში მასშტაბური საპროტესტო აქციები მიმდინარეობს. დემონსტრანტები აფრო-ამერიკელი მოქალაქის, ჯორჯ ფლოიდის დაკავებისას პოლიციის მიერ ძალის გადამეტებას აპროტესტებენ, რასაც ფლოიდის გარდაცვალება მოჰყვა.