ვარკეთილში, შერეული ბაზრობის ტერიტორიაზე სამგორის რაიონის გამგებელი კახა სამხარაძე ხანძრის შედეგად დაზარალებულებთან და ბაზრობის წარმომადგენლებთან შესახვედრად მივიდა.

როგორც სამხარაძემ ჟურნალისტებთან საუბრისას განაცხადა, გამგეობის მთავარი მიზანია არავინ დარჩეს უყურადღებოდ და შესაძლებლობების ფარგლებში, პროცესში მაქსიმალურად იქნებიან ჩართულები.

„ჩვენ მთელი ღამე ვიყავით მოსახლეობასთან ერთად და ვებრძოდით ხანძარს. შევხვდებით მოსახლეობას, გავიგებთ მათ მოთხოვნებს. ჩვენი მთავარი მიზანია არავინ არ დარჩეს უყურადღებოდ და ჩვენი შესაძლებლობების ფარგლებში პროცესში ვიქნებით ჩართულები. ძალიან რთულია ზარალზე საუბარი, შიგნით სპეციალური სამსახურები მუშაობენ, როდესაც შევლენ და დაიწყებენ დათვლას, მას შემდეგ შეიძლება ზარალზე ვისაუბროთ. რაც გადარჩენილია, არავინ არ გაანადგურებს, ტერიტორია უსაფრთხოების ნორმებიდან გამომდინარე არის იზოლირებული. ბაზრის წარმომადგენლებთან დაგეგმილია შეხვედრა და დღეს, რამდენიმე ხანში მათთან გვექნება კომუნიკაცია და საუბარი,” - განაცხადა კახა სამხარაძემ.