თამარ ჩუგოშვილი - ჟურნალისტის სიცოცხლისთვის საფრთხის შექმნა ან მუქარის განხორციელება მძიმე დანაშაულია, მთავარია, სახელმწიფომ მოახერხოს ამ პირების დაცვა

ჟურნალისტის სიცოცხლისთვის საფრთხის შექმნა ან მუქარის განხორციელება მძიმე დანაშაულია, მთავარია, სახელმწიფომ მოახერხოს იმ პირების დაცვა, რომლებსაც მსგავსი რამ ემუქრებათ,- ამის შესახებ დამოუკიდებელმა დეპუტატმა თამარ ჩუგოშვილმა განაცხადა, რითაც გამოეხმაურა ინფორმაციას იმის თაობაზე, რომ რამდენიმე დღის წინ დაკავებული რუსეთის მოქალაქე, ეროვნებით ინგუში ვასამბეგ ბადრის ძე ბოკოვი ჟურნალისტ გიორგი გაბუნიას ლიკვიდაციას გეგმავდა.

მან ასევე უპასუხა, რამდენად სწორი იყო თავის დროზე გაბუნიას მონოლოგზე გაკეთებული ხისტი განცხადებები პოლიტიკოსების მხრიდან და აღნიშნა, რომ გაბუნიას განცხადებების შინაარსზე თავადაც მწვავე რეაქცია ჰქონდა.

"ძალიან მნიშვნელოვანია და კარგია, რომ ჩვენმა უსაფრთხოების სამსახურებმა დროულად გადადგეს გარკვეული ნაბიჯები და მიიღეს ზომები. ჟურნალისტის სიცოცხლისთვის საფრთხის შექმნა ან მუქარის განხორციელება, ეს ყველამ ვიცით, რომ მძიმე დანაშაულია, მთავარია, სახელმწიფომ მოახერხოს დაცვა იმ პირების, რომლებსაც მსგავსი რამ ემუქრებოდეთ. რეაქცია (ჟურნალისტის მონოლოგზე) ყველას მხრიდან მწავავე იყო ჩემი ჩათვლით, მაგრამ ეს არ ნიშნავს, რომ ადამიანი მოკლას ვიღაცამ თუნდაც პირადად ჩემთვის მიუღებელი რაღაცის გამო. მეც გამოვეხმაურე მაშინ და ჩემთვის მაშინაც მიუღებელი იყო შინაარსი, ახლაც მიუღებელია, მაგრამ ასეთივე და კიდევ უფრო მიუღებელია ადამიანის სიცოცხლეს რომ საფრთხე დაემუქროს,"- განაცხადა ჩუგოშვილმა.

ცნობისთვის, ტელეკომპანია "მთავარის" გენერალური დირექტორის, ნიკა გვარამიას განცხადებით, კონტრტერორისტული სამსახურის მიერ ქავთარაძის ქუჩაზე, რამდენიმე დღის წინ დაკავებული რუსეთის მოქალაქე, ეროვნებით ინგუში ვასამბეგ ბადრის ძე ბოკოვი ჟურნალისტ გიორგი გაბუნიას ლიკვიდაციას გეგმავდა. გვარამიას ინფორმაციით, გიორგი გაბუნიას ლიკვიდაცია ჩეჩნეთის ლიდერის, რამზან კადიროვის დაკვეთით იგეგმებოდა, რისი მიზეზიც გაბუნიას მიერ პუტინის მისამართით, ჯერ კიდევ "რუსთავი 2"-ზე მუშაობისას, მის გადაცემაში გაკეთებული განცხადება იყო.

ზვიად კირტავა - ფრთხილი ოპტიმიზმი შეიძლება მქონდეს, რომ შევძლებთ მოსახლეობის საყოველთაო ვაქცინაციას, მაგრამ ჯერჯერობით ფრთხილი, - გეგმა არ გვინახავს
ქართული პრესის მიმოხილვა 22.01.2021
რა გეგმები აქვს ქუთაისის საერთაშორისო უნივერსიტეტს და რა პროგრამებს სთავაზობს სტუდენტებს? - ინტერვიუ უნივერსიტეტის კანცლერ მაგდა მაღრაძესთან
ბათუმში ბალნეოლოგიურ-გამაჯანსაღებელი ცენტრი აშენდება
2020 წელს ინტელიექსპრესის მიერ საქართველოში შემოტანილი ფულადი გზავნილების მოცულობამ 265 მილიონ დოლარს გადააჭარბა
ეფექტური გზა რესპირაციული ინფექციების პრევენციისთვის