ბოლნისის მუნიციპალიტეტის სოფელ მუშევანში, ლაბორატორიული კვლევის შედეგად, კორონავირუსი ერთ პირს დაუდასტურდა. როგორც "ინტერპრესნიუსს" ბოლნისის მუნიციპალიტეტის მერიაში განუცხადეს, ინფიცირების ახალი დადასტურებული შემთხვევა, სოფელ მუშევანიდანაა, ის ინფიცირებულ პირთან კონტაქტში იყო და მკაცრ კარანტინში ეპიდემიოლოგების დაკვირვების ქვეშ იმყოფებოდა.

ბოლნისის მუნიციპალიტეტში, ამ დროისთვის, კორონავირუსით ინფიცირების 192 დადასტურებული შემთხვევაა, მათგან 175 გამოჯანმრთელდა და 4 გარდაიცვალა.

საქართველოში კორონავირუსით ინფიცირების შემთხვევათა რაოდენობა 8-ით გაიზარდა და 906 გახდა. აქედან აქტიური შემთხვევების რიცხვი 137-ია. ამის შესახებ ინფორმაციას დაავადებათა კონტროლის ეროვნული ცენტრი ავრცელებს. გამოჯანმრთელებულთა რაოდენობა კი 3-ით გაიზარდა და 755-ს შეადგენს.