საფრანგეთის პრეზიდენტი ემანუელ მაკრონი და გერმანიის კანცლერი ანგელა მერკელი ევროპის ეკონომიკური გაჯანსაღების გეგმას განიხილავენ, - ამის შესახებ ინფორმაციას „როიტერსი“ საფრანგეთის პრეზიდენტის ადმინისტრაციაზე დაყრდნობით ავრცელებს.

მათივე ინფორმაციით, შეხვედრა გერმანიის ქალაქ მეზებერგში, 29 ივნისს გაიმართება და ეკონომიკური გაჯანსაღების გეგმის გარდა, ორი ლიდერი კოვიდ 19-სგან გამოწვეულ კრიზისსა და სხვა საერთაშორისო საკითხებს განიხილავს.

ცნობისათვის, მიმდინარე თვის დასაწყისში ცნობილი გახდა, რომ ეკონომიკური გაჯანსაღების გეგმის საკითხზე ევროკავშირის ქვეყნების ლიდერებს შორის უთანხმოება არსებობს. ემანუელ მაკრონი ორი დღის წინ ნიდერლანდების პრემიერ-მინისტრ მარკ რუტეს შეხვდა. საფრანგეთის პრეზიდენტის ადმინისტრაციამ განაცხადა, რომ შეხვედრა ევროკავშირის ბიუჯეტსა და გაჯანსაღების ფონდთან დაკავშირებით არსებული უთანხმოების აღმოსაფხვრელად წინგადადგმული ნაბიჯი იყო.