ჩეხეთის ღვაწლი საქართველოში COVID-19-ის მონიტორინგის კუთხით ფასდაუდებელი და ძალიან მნიშვნელოვანი იყო, - ამის შესახებ საქართველოს ჯანდაცვის მინისტრმა ეკატერინე ტიკარაძემ საქართველოში ჩეხეთის რესპუბლიკის ელჩთან, პეტრ მიკისკასთან, შეხვედრის დროს განაცხადა.

საქართველოში ჩეხეთის საელჩოს ინფორმაციით, შეხვედრაზე მხარეებმა ორმხრივი ურთიერთობების სხვადასხვა ასპექტი განიხილეს.

მათივე ინფორმაციით, თავის მხრივ ელჩმა ხაზი გაუსვა საქართველოს მნიშვნელოვან წარმატებას პანდემიის მოგვარებაში და აღნიშნა, რომ საქართველო "დამსახურებულად განიხილება მსოფლიოს საუკეთესო ქვეყნებს შორის, როდესაც საქმე კოვიდ 19-თან ბრძოლას ეხება."

შეხვედრას ასევე ესწრებოდნენ ჯანდაცვის სექტორისა და ჩეხეთის არასამთავრობო ორგანიზაციის, „ჩეხეთის რესპუბლიკის კარიტასი საქართველოში“ (Caritas Czech Republic in Georgia), წარმომადგენლები, რომელმაც ორი პროექტი წარადგინა: „გზა შინისაკენ“ - ზრდასრულთა ალტერნატიული სოციალური სერვისების განვითარება საქართველოში” და „პირველადი ჯანდაცვის გაძლიერების მხარდაჭერა საქართველოში (II ფაზა) ”, რომელიც ჩეხეთის განვითარების თანამშრომლობის მიერ 2 მილიონ ევროზე მეტითაა დაფინანსებული.