აშშ-ის მთავრობა კორონავირუსთან ბრძოლაში ნაკლებად ეფექტური აღმოჩნდა , - ამის შესახებ კომპანია Facebook-ის დამაარსებელმა და მილიარდერმა მარკ ცუკერბერგმა განაცხადა.

„ამ ეტაპზე ნათლად ჩანს, რომ აშშ-ში ტრაექტორია გაცილებით უარესია, ვიდრე უამრავ სხვა ქვეყანაში. ჩვენი მთავრობა და ეს ადმინისტრაცია ნაკლებად ეფექტური აღმოჩნდა კორონავირუსთან დაკავშირებული საკითხების მოგვარებაში“, - განაცხადა ცუკერბერგმა.

ამასთან, მან დონალდ ტრამპის ადმინისტრაცია განსაკუთრებით გააკრიტიკა ალერგიისა და ინფექციური დაავადებების ეროვნული ინსტიტუტის დირექტორის, ენტონი ფაუჩის დისკრედიტაციისთვის.

„ვფიქრობ, რომ ეპიდემიის აფეთქების თავიდან აცილება შესაძლებელი იყო და ნამდვილად იმედგაცრუებული ვარ იმით, რომ ჯერ კიდევ არ გვაქვს სათანადო ტესტირება, რომ ჩვენი საუკეთესო მეცნიერების სანდოობას ძირს უთხრიან, და რომ ბოლო დრომდე კითხვის ნიშნის ქვეშ დგებოდა პირბადის ტარების აუცილებლობა“, - განაცხადა ცუკერბერგმა.