ინფექციური პათოლოგიისა და შიდსის ცენტრის ხელმძღვანელი თენგიზ ცერცვაძე აცხადებს, რომ ამ დროისთვის გარდაბნის მუნიციპალიტეტის ჩაკეტვის საფუძველი არ არსებობს.
როგორც მან ჟურნალისტებს საკითხის კომენტირებისას განუცხადა, თუ ხვალ და ზეგ ინფიცირების ტენდენცია მატებისკენ შეიცვალა, გარდაბანი ამ შემთხვევაში დაიკეტება.
„რისკი რა თქმა უნდა არის, მაგრამ ჩვენი ეპიდემიოლოგიური სამსახური, ამირან გამყრელიძის ხელმძღვანელობით და ჩვენი მთავრობა, გიორგი გახარიას ხელმძღვანელობით უკვე მეხუთე თვეა რისკებს ადეკვატურად აფასებს. გარდაბნის კლასტერთან დაკავშირებით, იგნორირება რომ გავაკეთოთ ეს არ შეიძლება, მაშინ მართლა შეიძლება, იქიდან გავრცელდეს. მეორე მხრივ, ამ გარდაბნის კლასტერის გამო გადაჭარბებული რეაგირება რომ მოხდეს და მთელი გარდაბანი დაიკეტოს, როგორიც იყო მარნეული, ბოლნისი, ლენტეხი, ჯერ ამის საფუძველი არაა. მთავრობას და დაავადებათა კონტროლის ცენტრს ხელი უდევს პულსზე“, - განაცხადა ცერცვაძემ.