„თავისუფალი საქართველოს“ რეგიონალური ხელმძღვანელის ზურაბ ჯინჯოლავას განცხადებით, ფინანსურმა პოლიციამ ზუგდიდის ბაზარში მომუშავე მოვაჭრეები ძალის გამოყენებით დაარბია, რა დროსაც რამდენიმე მოვაჭრე ფიზიკურადაც დაშავდა.
„ორმოცდაათამდე პოლიციელი ბაზრის ტერიტორიაზე მოულოდნელად გამოჩნა. მათ ყოველგვარი განმარტების გარეშე დაიწყეს მოვაჭრეების დარბევა და მათთვის კუთვნილი პროდუქციის ჩამორთმევა. იმის ნაცვლად, რომ ხელისუფლება დე ფაქტო საზღვრიდან გადმოტანილ კონტრაბანდულ საქონელსა და მათ შემომტანებს ებრძოდეს, პირიქით ხდება, ადგილობრივი ხელისუფლება ძალის გამოყენებით კანონმორჩილ მოქალაქეებს ებრძვის და მათ ინტერესებს სრულ იგნორირებას უკეთებს“, - განაცხადა ზურაბ ჯინჯოლავამ.
მისივე განმარტებით, ძალოვანი უწყების წარმომადგენლებმა ჩატარებული სპეცოპერაციის შედეგად უაქციზო სიგარეტის ამოღების მოტივით აქციზური სიგარეტის კოლოფებიც კი გაანადგურეს, ასევე დარბეულია მოვაჭრეთა სავაჭრო დახლებიც.
„ხელისუფლებას ურჩევნია, იმ პრობლემებს მიხედოს, რომელიც წლებია უკვე ზუგდიდსა და მთლიანად რეგიონს აწუხებს. იმის მაგივრად, რომ პოლიცია უკანონობას ებრძოდეს, თავად აფარებს ხელს დამნაშავეებს და ხელს უწყობს კონტაბანდული ტვირთების შემოტანას აფხაზეთიდან. ის რაც დღეს მოხდა, ეს არის ხელისუფლების წინასაარჩენო „ტრიუკი“, რომ თითქოს წესრიგს იცავს რეგიონსა და ზოგადად ქვეყანაში“, - განაცხადა ჯინჯოლავამ.