რომის პაპი ფრანცისკე საერთაშორისო საზოგადოებას ლიბანისა და მასშტაბური აფეთქების დროს დაზარალებული მოსახლეობისთვის ლოცვისკენ მოუწოდებს.

„გუშინ, ბეირუთში, პორტთან ახლოს მასშტაბური აფეთქება მოხდა, რამაც ათობით ადამიანის სიკვდილი, ათასობით ადამიანის დაშავება და სერიოზული ნგრევა გამოიწვია. მოდით, ვილოცოთ მსხვერპლთათვის და მათი ოჯახებისთვის, მოდით, ვილოცოთ ლიბანისთვის, რომ ის მთელი მისი სოციალური, პოლიტიკური და რელიგიური სფეროების რესურსების მობილიზების წყალობით, მედგრად დახვდეს უკიდურესად ტრაგიკულ და მტკივნეულ მომენტს და საერთაშორისო საზოგადოების დახმარებით გადალახოს მის წინაშე არსებული მწვავე კრიზისი“, - განაცხადა რომის პაპმა ტრადიციული აუდიენციის დროს.

შეგახსენებთ, ბეირუთში გუშინ მომხდარი ძლიერი აფეთქების შედეგად დაღუპულთა რაოდენობა 100-მდე, ხოლო დაშავებულთა რიცხვი 4 000-მდე გაიზარდა. ლიბანის ოფიციალური პირები მომხდარს ასაფეთქებელი ნივთიერებების საწყობს უკავშირებენ.