გიორგი პერტაია - უახლოეს მომავალში სავაჭრო პალატა წარმოგიდგენთ საქართველოში წარმოებული პროდუქციისა და ქართველი მეწარმეების პოპულარიზაციის ახალ პროექტს
უახლოეს მომავალში პალატა წარმოგიდგენთ საქართველოში წარმოებული პროდუქციისა და ქართველი მეწარმეების პოპულარიზაციის ახალ პროექტს, - ამის შესახებ სავაჭრო პალატის პრეზიდენტმა, გიორგი პერტაიამ „ინტერპრესნიუსთან“ ინტერვიუში სამომავლო გეგმებზე საუბრისას აღნიშნა.
როგორც გიორგი პერტაიამ განაცხადა, ბიზნესი მიუთითებს პრობლემებზე ნაწარმის ცნობადობისა და გაყიდვების ნაწილში.
„ბევრი მეწარმის თანახმად, პროდუქციის წარმოებაში ისინი იღებენ მხარდაჭერას, მაგრამ პრობლემები აქვთ მათი ნაწარმის ცნობადობისა და გაყიდვების ნაწილში. დღესდღეობით ეს პრობლემა განსაკუთრებით აქტუალურია ონლაინ სივრცესა თუ სოციალური ქსელების ჭრილში. ამ მიზნით, უახლოეს მომავალში პალატა წარმოგიდგენთ საქართველოში წარმოებული პროდუქციისა და ქართველი მეწარმეების პოპულარიზაციის ახალ პროექტს. აღნიშნული პროექტიც განთავსდება ჩვენს ვებგვერდზე და მონაწილეობის მიღება ნებისმიერ მეწარმეს შეეძლება”,-განაცხადა გიორგი პერტაიამ.
სავაჭრო პალატას სურვილი აქვს განახორციელოს პროექტი ელექტრონული კომერციის მიმართულებით, რომელიც განსაკუთრებით რეგიონებში შეუწყობს ხელს ამ კუთხით ბიზნესის გაძლიერებას.
