UNDP - მოწყვლადი მოსახლეობის დაცვა განსაკუთრებით მნიშვნელოვანია პანდემიაზე რეაგირებისა და შემდგომი აღდგენის დროს

გაეროს განვითარების პროგრამა (UNDP) მუნიციპალურ თავშესაფრებს ეხმარება. გაეროს განვითარების პროგრამის ინფორმაციით, სამ მუნიციპალურ თავშესაფარს თბილისში, რუსთავსა და სამტრედიაში სამედიცინო და საყოფაცხოვრებო აღჭურვილობა გადაეცა, მათ შორის ჟანგბადის კონცენტრატორები, წყლის გამაცხელებელი ავზები, საყოფაცხოვრებო ტექნიკა, ავეჯი და სხვა ნივთები, რომლებიც თავშესაფრების კეთილმოწყობას და 200-მდე მიუსაფარი და ხანდაზმული ადამიანის საცხოვრებელი პირობების გაუმჯობესებას მოხმარდება.

მათივე ცნობით, დახმარების ორგანიზატორია გაეროს განვითარების პროგრამა (UNDP) დანიის მთავრობისა და გაეროს პანდემიაზე რეაგირებისა და აღდგენის ფონდის ფინანსური ხელშეწყობით.

თავშესაფრების მხარდაჭერის მიზანია მოწყვლადი და მიუსაფარი ადამიანებისთვის განკუთვნილი მუნიციპალური სერვისების განვითარება და მაღალი რისკის მქონე მოწყვლადი მოსახლეობის ხელშეწყობა პანდემიის პირობებში.

6 აგვისტოს თბილისისა და რუსთავის მუნიციპალური თავშესაფრები UNDP-ის ხელმძღვანელმა ლუიზა ვინტონმა, საქართველოს რეგიონული განვითარებისა და ინფრასტრუქტურის მინისტრის მოადგილემ მზია გიორგობიანმა, თბილისის მერის მოადგილემ ანდრია ბასილაიამ და რუსთავის მერმა ირაკლი ტაბაღუამ მოინახულეს. სტუმრები შეხვდნენ თავშესაფრების ადმინისტრაციას და მაცხოვრებლებს გაესაუბრნენ. 11 აგვისტოს კი UNDP-ის ხელმძღვანელი სამტრედიის თავშესაფარს მოინახულებს.

„უსახლკარო და ოჯახის ზრუნვას მოკლებული ადამიანებისთვის კორონავირუსის პანდემია განსაკუთრებულ საფრთხეს წარმოადგენს. ამ მხრივ, თავშესაფრების არსებობა ნამდვილად მისასალმებელია. UNDP-ის მიზანია, თავშესაფრების უსაფრთხოებისა და საცხოვრებელი პირობების გაუმჯობესება, ხოლო პანდემიის შემდგომ პერსპექტივაში, გრძელვადიანი სისტემური გადაწყვეტილებების მოძიება მოწყვლადი მოსახლეობის დასახმარებლად“, - განაცხადა ლუიზა ვინტონმა.

მათივე ინფორმაციით, მუნიციპალური თავშესაფრების ხელშეწყობა იმ უფრო ფართო დახმარების ნაწილია, რომელიც გაერთიანებული ერების ორგანიზაციამ მსოფლიოს ქვეყნების მთავრობებსა და მოსახლეობას პანდემიაზე რეაგირების ფარგლებში შესთავაზა. გაეროს დახმარება ხორციელდება გაეროს გენერალური მდივნის მიერ დაარსებული ფონდის მეშვეობით, რომელიც კრიზისზე რეაგირებასა და კრიზისის შემდგომ აღდგენას ემსახურება. საქართველო იმ პირველი 46 ქვეყნის ჩამონათვალშია, რომლებიც ამ ფონდის დახმარებით სარგებლობენ. პანდემიით ყველაზე მეტად დაზარალებული და მოწყვლადი ჯგუფების დასახმარებლად გაეროს სააგენტოებმა 1 მილიონი აშშ დოლარი მიიღეს.

გაეროს განვითარების პროგრამის ინფორმაციით, საქართველოში კორონავირუსის გავრცელების პირველივე დღეებიდან გაეროს განვითარების პროგრამა (UNDP) პანდემიასთან ბრძოლისა და ამ მხრივ საქართველოს ხელშეწყობის მოწინავე ხაზზეა. ქვეყანაში შექმნილი ვითარების გათვალისწინებით, UNDP-მ ცვლილებები შეიტანა მიმდინარე პროექტებში, რომელთა ჯამური ღირებულება წელიწადში 20 მილიონ აშშ დოლარს შეადგენს, და გამოთავისუფლებული რესურსები პანდემიის დროს წარმოქმნილი საჭიროებების დაკმაყოფილებას მოახმარა.

სხვა ინიციატივებს შორის, UNDP აქტიურად ეხმარება ადგილობრივ მუნიციპალიტეტებსა და მოსახლეობას. ეს დახმარება ხორციელდება დანიის მთავრობის მიერ დაფინანსებული პროგრამის ფარგლებში, რომელსაც UNDP რეგიონული განვითარებისა და ინფრასტრუქტურის სამინისტროსთან თანამშრომლობით ახორციელებს. პროგრამის მიზანია საქართველოში დეცენტრალიზაციისა და კარგი მმართველობის ხელშეწყობა, ხოლო მისი მთლიანი ბიუჯეტი 4 მილიონ აშშ დოლარს აღემატება.

ბორის სოკოლოვი - ბელარუსში პროცესები შესაძლოა დასრულდეს ან საპროტესტო აქციების ჩახშობით ან ლუკაშენკოს ხელისუფლების დამხობით
ქართული პრესის მიმოხილვა 21.09.2020
ალექსანდრე თვალჭრელიძე - „ქართული ოცნების“ ეკონომიკური პროგრამა გაცილებით უფრო მოკრძალებული, მაგრამ, ამავდროულად, გაცილებით უფრო რეალისტურია
სერვისი, რომელიც ბუნებრივი რესურსების მოპოვების ბიზნესს ამარტივებს
სამშენებლო კომპანია "ანაგი" განცხადებას ავრცელებს (R)