ერაყის საგარეო უწყება აცხადებს, რომ თურქეთის მიერ ქურთების რეგიონში დრონის საშუალებით განხორციელებული თავდასხმა „აღმაშფოთებელი ფაქტია“, რის გამოც თურქეთის ელჩი სამინისტროში დაიბარეს, - ამის შესახებ ინფორმაციას „ალ-ჯაზირა“ ავრცელებს.

ერაყის საგარეო საქმეთა სამინისტროს ინფორმაციით, ელჩს მკაცრი შინაარსის საპროტესტო წერილი უნდა გადაეცეს.

გარდა ამისა, ერაყის საგარეო უწყება უარს აცხადებს მიიღოს თურქეთის საგარეო საქმეთა მინისტრი, რომლის ვიზიტიც ქვეყანაში მიმდინარე კვირის ხუთშაბათისთვის იყო დაგეგმილი.

გავრცელებული ინფორმაციით, სამშაბათს, თურქეთის მიერ ერაყის ჩრდილოეთით ქურთების მუშათა პარტიის წინააღმდეგ განხორციელებული დარტყმის დროს ერაყის საზღვრის დაცვის ბატალიონის ორი მეთაური და იმ მანქანის მძღოლი დაიღუპნენ, რომელშიც მეთაურები იმყოფებოდნენ.

ცნობისათვის, თურქეთმა ქურთების მუშათა პარტიის წინააღმდეგ ოპერაცია მიმდინარე წლის ივნისის შუა რიცხვებში დაიწყო.