„რეფორმერი“ - ჯანდაცვის სამინისტროსა და ინფექციური საავადმყოფოს ადმინისტრაციის დაპირისპირება აზიანებს  სექტორს, რომელსაც ისედაც ბევრი პრობლემა აქვს გადასაჭრელი

პოლიტიკური პარტია „რეფორმერის“ თავმჯდომარის, თორნიკე ჯანაშვილის განცხადებით, იმ დროს, როდესაც ჯანდაცვის სპეციალისტები COVID 19 - ის მოსალოდნელი მეორე ტალღის შესახებ საუბრობენ, ჯანდაცვის სამინისტროსა და ინფექციური საავადმყოფოს ადმინისტრაციას შორის დაპირისპირება აზიანებს სექტორს, „რომელსაც ისედაც ბევრი პრობლემა აქვს გადასაჭრელი“. როგორც ჯანაშვილი აცხადებს, საავადმყოფოებში დგას უმწვავესი საინჟინრო პრობლემები და გაიდლაინები, რომელიც აქვთ, საერთაშორისო სტანდარტებს არ აკმაყოფილებს.

„ვიცით, რამდენი პრობლემა აქვს ჯანდაცვის სისტემას. ზუსტად ამ სექტორის ძირეული ცვლილებების საჭიროებაზე საუბრობს პარტია „რეფორმერი“. ჩვენი პარტიის ჯანდაცვის პროგრამაში დეტალურად გვაქვს გაწერილი ის პრობლემები და გამოწვევები, რაც ამ სექტორშია გადასაჭრელი. ჯანდაცვის სისტემაში ინფრასტრუქტურის მოთხოვნები აცდენილია საერთაშორისო ნორმებს, დაუცველია ბაქტერიებისა და ვირუსების გავრცელების თავიდან აცილების სტანდარტი, არ არსებობს ან სტანდარტის მიხედვით არ არის მოწყობილი ე.წ. სუფთა ზონები.

საავადმყოფოებში დგას უმწვავესი საინჟინრო პრობლემები - საავადმყოფო მაღალტექნოლოგიური დაწესებულებაა და მოითხოვს ცალკე IT ინფრასტრუქტურას, სპეციალურ თანამშრომლებს, რომლებიც ამ აპარატურისა და სისტემების სათანადო წესით მუშაობაზე აგებენ პასუხს. წარმოუდგენელია თავად ექიმი ზრუნავდეს მისი მუშაობისთვის აუცილებელი აპარატურის გამართულ ფუნქციონირებაზე.

არ არსებობს გაიდლაინები, ის რაც გვაქვს, არ აკმაყოფილებს საერთაშორისო სტანდარტებს. როგორც წესი, გაიდლაინების შემუშავება ხდება საჭიროების მიხედვით, როგორც ახლა COVID 19-ის პანდემიის დროს მოხდა.

უნდა შეიქმნას საერთაშორისო ექიმთა დახელოვნების სკოლა, ძლიერი ბაზით. დღეს არსებული პრაქტიკული კურსი არ არის საკმარისი თანამედროვე სტანდარტის პროფესიონალების ზრდისთვის, აუცილებელია მეტი პრაქტიკული გამოცდილება, რაც მისცემს საშუალებას სამედიცინო პროფილის სტუდენტებს გაიარონ კვალიფიციური პრაქტიკა, რაც მათ წარმატებულ დასაქმებას განაპირობებს.

სამედიცინო საქმიანობის 80% - ზე მეტს ასრულებს ექთანი, სამწუხაროდ, მათ აქვთ დაბალი ანაზაღაურება. სახელმწიფომ და კერძო სექტორმა ერთიანად უნდა უზრუნველყოს საერთაშორისო საექთნო სკოლის შექმნა, რაც განაპირობებს მაღალი კვალიფიკაციის სამედიცინო პერსონალის აღზრდას. ეს არის დიდი ინვესტიცია ჯანდაცვის სექტორში. ექთნების მაღალი კვალიფიკაცია ავტომატურად გამოიწვევს ექთნების ხელფასების გაზრდას. მაღალი კვალიფიკაციის სამედიცინო პერსონალი ხელს შეუწყობს სამედიცინო ტურიზმის განვითარებასაც“,- განაცხადა პარტია „რეფორმერის“ თავმჯდომარე თორნიკე ჯანაშვილმა.

თორნიკე ჯანაშვილის კომენტარს „რეფორმერის“ პრესსამსახური ავრცელებს.

იოსებ ბარათაშვილი - სააკაშვილის პატიმრობაში ყოფნა საქართველოს  ხელისუფლებას საკმაოდ  რთული პრობლემის წინაშე აყენებს
ქართული პრესის მიმოხილვა 18.10.2021
ვახტანგ ძაბირაძე - თუ ხელისუფლება და ოპოზიცია მეორე ტურის უკეთ გასაკონტროლებლად კონკრეტულ მექანიზმებზე ვერ შეთანხმდნენ, მაშინ გამოვა, რომ ორივე მხარე შეგნებულად მიდის ვითარების გამწვავებაზე
„გორგია“ ბათუმში დაზარალებულ ყველა ოჯახს მათთვის საჭირო ტექნიკას, ავეჯსა და საყოფაცხოვრებო ნივთებს გადასცემს