დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელის, ამირან გამყრელიძის განცხადებით, კორონავირუსის 17 ახალი შემთხვევიდან ყველას ინფიცირების წყარო ცნობილია. ამის შესახებ „ინტერპრესნიუსს“ გამყრელიძემ განუცხადა.

„დღეს, დილის 09:00 საათისთვის ქვეყანაში კორონავირუსის 17 ახალი შემთხვევა გვაქვს, მათგან 11 უკავშირდება მესტიის მუნიციპალიტეტის ლენჯერის თემის კლასტერს, თუმცა, თვითონ ლენჯერში დადასტურებულია 7, ხოლო 4 შემთხვევა გახლავთ მესტიის მუნიციპალიტეტის გარეთ. ერთი არის დადასტურებულ შემთხვევასთან კონტაქტი, რომელიც უკავშირდება ყაზბეგის კლასტერს. 5 გახლავთ იმპორტირებული შემთხვევა, მათგან 3 სატვირთო ავტომობილის მძღოლია. ყველა შემთხვევის წყარო ვიცით, გაურკვეველი არცერთი არ არის.

ამავდროულად, ბოლო სამი დღეა მესტიის მუნიციპალიტეტში ინტენსიური ტესტირება მიმდინარეობს. მოგეხსენებთ, კარანტინში მყოფი ადამიანებიდან ბევრს უმთავრდება 12 - დღიანი ვადა. ბოლო 3 დღის განმავლობაში მესტიის მუნიციპალიტეტის მასშტაბით ასეთი 1052 პირი გამოიკვლიეს. როგორც მოგახსენეთ, დადებითი შემთხვევები გვაქვს მხოლოდ ლენჯერში, კარანტინში მყოფი ადამიანების პასუხი ყველა უარყოფია და ისინი საკარანტინო სივრცეს დატოვებენ“, - განაცხადა გამყრელიძემ.