დიდუბე-ჩუღურეთის რაიონის დამოუკიდებელი მაჟორიტარი დეპუტატობის კანდიდატის ანა დოლიძის საარჩევნო კამპანიის დროს მომხდარ ინციდენტზე გამოძიება სისხლის სამართლის კოდექსის 151-ე მუხლით (მუქარა) დაიწყება.
როგორც გამოკითხვიდან გამოსვლის შემდეგ ანა დოლიძემ განაცხადა, მან გამოძიებას დეტალურად მოახსენა წერეთლის გამზირი N105-ში მომხდარი ინციდენტის შესახებ და დაასახელა ის პირები, ვინც შესაძლოა გამოძიებას ჭეშმარიტების დადგენაში დაეხმაროს.
ანა დოლიძის თქმით, სამართალდამცველებმა დეპუტატობის კანდიდატს განუცხადეს, რომ მომხდართან დაკავშირებით, გამოძიება სისხლის სამართლის კოდექსის 151-ე მუხლით (მუქარა) დაიწყება, რომლის კვალიფიკაცია გამოძიების პროცესში შესაძლოა შეიცვალოს.
მისივე ინფორმაციით, ინციდენტის ვიდეო ჩანაწერს სამართალდამცველებს ხვალ, ხელახალი გამოკითხვისას წარუდგენს.
შეგახსენებთ, რომ 13 აგვისტოს, წერეთლის N105-ში საარჩევნო კამპანიის დროს ანა დოლიძეს, მის გუნდს და ამომრჩევლებს ადამიანების ჯგუფმა სიტყვიერი შეურაცხყოფა მიაყენა, რის შემდეგაც მან საგამოძიებო ორგანოს გამოძიების დაწყების მოთხოვნით მიმართა.