კორონავირუსით ინფიცირების 7 ახალი დადასტურებული შემთხვევიდან, 2 პაციენტი რუხის კლინიკაში მკურნალობს. როგორც რუხის საავადმყოფოს დირექტორის მოვალეობის შემსრულებელმა ნინო ჯანაშიამ ჟურნალისტებთან განაცხადა, მათგან ერთი ოკუპირებული აფხაზეთიდან არის გადმოსული.
„დილით კლინიკაში მკურნალობას იტარებს 5 დადასტურებული შემთხვევა, რომელთაგან 2 პაციენტი დაგვემატა გუშინ. ამ ორიდან ერთი არის აფხაზეთიდან შემოსული, როგორც დადასტურებული შემთხვევა. პაციენტების ზოგადი მდგომარეობა არის სტაბილური, მათ უტარდებათ დამატებითი კვლევები. რაც შეეხება დანარჩენ პაციენტებს, კლინიკაში ასევე, გვყავს ცხელებით 4 პაციენტი, რომლებსაც ასევე, დღის განმავლობაში ჩაუტარდებათ სათანადო გამოკვლევები,“- განაცხადა ნინო ჯანაშიამ.
შეგახსენებთ, საქართველოში კორონავირუსის 7 ახალი შემთხვევა გამოვლინდა და ინფიცირებულთა რაოდენობა 1469 გახდა.