აუცილებელია საერთაშორისო ორგანიზაციების მობილიზება, რაც შეიძლება დიდი ოდენობით დამკვირვებლის ჩამოსვლა, იმისთვის, რომ გამოვრიცხოთ ხელისუფლების მხრიდან ცდუნება არჩევნების გაყალბების მიმართულებით. ეს ცდუნება აუცილებლად ექნება ხელისუფლებას, - ამის შესახებ „ლელოს" ერთ-ერთმა ლიდერმა ბადრი ჯაფარიძემ ჟურნალისტებს განუცხადა, რითაც გამოეხმაურა „ეროვნულ დემოკრატიული ინსტიტუტის“ განცხადებას, რომ NDI საქართველოში საერთაშორისო დამკვირვებლებს არ გამოგზავნის.
ბადრი ჯაფარიძის თქმით, რა თქმა უნდა, სამწუხაროა, რომ NDI-მ ასეთი გადაწყვეტილება მიიღო პანდემიით შექმნილი პრობლემებიდან გამომდინარე. მისივე თქმით, ამავდროულად კონტაქტი აქვთ ეუთო/ოდირთან, რაც შეიძლება მეტი რაოდენობის დამკვირვებლები ჩამოვიდნენ საქართველოში იმისთვის, რომ მაქსიმალური მონიტორინგი განხორციელდეს არჩევნებამდე პერიოდის და არჩევნების დღეს.
„ძალიან მნიშვნელოვანია, რომ სხვა საერთაშორისო ორგანიზაციებმა რაც შეიძლება დიდი ოდენობით დამკვირვებლების გამოგზავნა შეძლონ ჩვენს ქვეყანაში, იმისთვის, რომ ჩვენ გვქონდეს მათი მხრიდან მონიტორინგი წინასაარჩევნო პერიოდში და არჩევნების დღეს. ხელისუფლებიდან პოზიტიური მოლოდინი არ გვაქვს, აქედან გამომდინარე აუცილებელია საერთაშორისო ორგანიზაციების მობილიზება, რაც შეიძლება დიდი ოდენობით დამკვირვებლის ჩამოსვლა, იმისთვის, რომ გამოვრიცხოთ ხელისუფლების მხრიდან ცდუნება არჩევნების გაყალბების მიმართულებით. ეს ცდუნება აუცილებლად ექნება ხელისუფლებას“, - განაცხადა ბადრი ჯაფარიძემ.