აშშ-ის ქალაქ პორტლენდში, სადაც რასიზმსა და პოლიციის მხრიდან ძალადობას სამ თვეზე მეტი ხანია აპროტესტებენ, პოლიციასა და დემონსტრანტებს შორის დაპირისპირების დროს სამართალდამცავებმა 50-ზე მეტი ადამიანი დააკავეს,- ამის შესახებ ინფორმაციას Reuters-ი ავრცელებს.
სააგენტოს ცნობით, აქციის მონაწილეებმა სამართალდამცველებს ქვები და ცეცხლგამჩენი ბომბები დაუშინეს. პოლიციამ აქციის დასაშლელად ცრემლსადენი გაზი და კონტროლის სხვა საშუალებები გამოიყენა.
პორტლენდის პოლიციამ განცხადება გაავრცელა, სადაც აღნიშნულია, რომ ცეცხლგამჩენი ბომბებით აქციის ერთი მონაწილე და ერთი სამართალდამცავი დაშავდნენ.
ორეგონის შტატის ქალაქ პორტლენდში რასიზმისა და პოლიციის მხრიდან ძალადობის საწინააღმდეგო აქციები მას შემდეგ მიმდინარეობს, რაც 3 თვეზე მეტი ხნის წინ 46 წლის მამაკაცი ჯორჯ ფლოიდი პოლიციის ძალადობის შედეგად დაკავების დროს გარდაიცვალა. აქციის მონაწილეები საპოლიციო და სოციალური რეფორმების განხორციელებას მოითხოვენ.