ისრაელში, ბოლო 24 საათში, კორონავირუსის 3 904 ახალი შემთხვევა დადასტურდა, რაც ქვეყნისთვის რეკორდულად მაღალი დღიური მაჩვენებელია.

ქვეყნის მთავარი ეპიდემიოლოგი, პროფესორი რონი გამზუ, რომელიც კოლეგის ინფიცირების შემდეგ კარანტინში იმყოფება, დღეს კონავირუსთან დაკავშირებულ ახალ რეკომენდაციებზე ისაუბრებს. მედიის ინფორმაციით, გამორიცხული არ არის, რომ ისრაელში საყოველთაო კარანტინი კვლავ გამოცხადდეს.

აღსანიშავია, რომ ხელისუფლებამ იმ ქალაქებში, სადაც ინფიცირების შემთხვევებმა განსაკუთრებით მოიმატა, სკოლები დახურა და ღამის საათებში შეზღუდვები დააწესა.

ისრაელის პრემიერ-მინისტრი ბენიამინ ნეთანიაჰუ აცხადებს, რომ ხელისუფლება ეკონომიკისა შესანარჩუნებლად და ადამიანების ჯანმრთელობისა და სიცოცხლის გადასარჩენად ყველაფერს აკეთებს.

ცნობისათვის, ისრაელში 474 კოვიდ პაციენტი მძიმე მდგომარეობაშია, დღემდე კი ვირუსს 1 000-ზე მეტი ადამიანის სიცოცხლე შეეწირა.