საქართველოს წითელი ჯვრის საზოგადოების პრეზიდენტმა, ნათია ლოლაძემ თბილისის მერიის პირველ მოადგილესთან, ილია ელოშვილთან ერთად წითელი ჯვრის მოხალისეებს გაწეული მხარდაჭერისა და გამბედაობისთვის გადასცა მადლობის სიგელები.

როგორც „ინტერპრესნიუსს“ საქართველოს წითელი ჯვრის საზოგადოებიდან აცნობეს, ქვეყანაში კორონავირუსის გავრცელების საწყისი ეტაპიდან ჩართულია მოსახლეობის მხარდასაჭერად სხვადასხვა მიმართულებით. აღნიშნულ აქტივობებს ორგანიზაცია ახორციელებს მოხალისეთა დახმარებით, რომლებიც დღემდე დაუღალავად შრომობენ თანამოქალაქეების დასახმარებლად.

მათივე ინფორმაციით, აღნიშნული მოხალისეები პენდემიის პერიოდში ახორციელებდნენ სხვადასხვა საქმიანობას: დახმარებას უწევდნენ მოსახლეობის მოწყვლად ჯგუფებს, არიგებდნენ სასურსათო და ჰიგიენურ ამანათებს, ავრცელებდნენ რეკომენდაციებს როგორც ქართულ, ისე სომხურ, აზერბაიჯანულ, აფხაზურ და ოსურ ენებზე, 24 საათის განმავლობაში პასუხობდნენ ცხელ ხაზზე შემოსულ ზარებს, თბილისის მერიასთან პარტნიორობით სხვადასხვა ჰიპერმარკეტში ხანდაზმულთათვის აგროვებდნენ სასურსათო და ჰიგიენურ ამანათებს, საბაჟო-გამშვებ პუნქტებზე ატარებდნენ მონიტორინგს, ჩართული იყვნენ თერმოსკრინინგის პროცესში და დღემდე მეთვალყურეობენ PCR ტესტირებებს ვირუსის დიაგნოსტირებისათვის. საქართველოს წითელი ჯვრის საზოგადოება გამოწვევებით სავსე პერიოდში გამოჩენილი თავდადებისა და გამბედაობისთვის მადლობას უხდის წითელი ჯვრის თითოეულ მოხალისეს.