„ლელოს“ ისნის მაჟორიტარი დეპუტატობის კანდიდატმა, ლანა გალდავამ მოსახლეობასთან ერთად კახეთის გზატკეცილზე, ნოე ხომერიკის ქუჩაზე მიმდინარე სარეაბილიტაციო სამუშაოები გააპროტესტა.
გალდავას განცხადებით, ხომერიკის ქუჩაზე გზა 2 წლის განმავლობაში ვერ დააგეს და სარეაბილიტაციო სამუშაოები შრომის უსაფრთხოების დარღვევით მიმდინარეობს, რაც მოსახლეობის სიცოცხლეს საშიშ მდგომარეობაში აგდებს.
,,ეს ქუჩა არის პირდაპირი მაგალითი იმისა, თუ რას წარმოადგენს „ოცნების“ ხელისუფლება. ეს ქუჩა გადათხარეს 2 წლის წინ და გზა ჯერ კიდევ ვერ დააგეს. უამრავჯერ მოხდა ამ ქუჩაზე ტენდერის გამოცხადება და გაიხარჯა რეაბილიტაციისათვის თანხები. მოსახლეობა იმყოფება სიცოცხლისათვის საშიშ მდგომარეობაში, ახდილია ჭები და შრომის უსაფრთხოება არის დაუცველი. მას შემდეგ, რაც განვაცხადე ამ პრობლემის შესახებ გამოაგზავნეს გამგეობიდან ტრაქტორი 2 კვირის წინ, მაგრამ მაინც არაფერი ხდება.
სასწრაფოდ მოვითხოვთ, რომ გამგეობა გამობრძანდეს იმ ჩრდილიდან, რომელშიც იმალებიან, სასწრაფოდ გააკეთონ ქუჩის რეაბილიტაცია უსაფრთხოების გათვალისწინებით და ამ მოსახლეობას ერთხელ და საბოლოოდ მიეცეს ქუჩით ნორმალურად სარგებლობის უფლება“, - აღნიშნა ლანა გალდავამ