თამარ ბაჩალიაშვილის ოჯახის ადვოკატი და „ადამიანის უფლებათა ცენტრის“ იურისტი თბილისის პროკურატურაში მივიდნენ
თამარ ბაჩალიაშვილის ოჯახის ადვოკატი მიხეილ რამიშვილი და „ადამიანის უფლებათა ცენტრის“ იურისტი ეკა ქობესაშვილი თბილისის პროკურატურაში მივიდნენ.
როგორც ქობესაშვილმა ჟურნალისტებს განუცხადა, ბაჩალიაშვილის ოჯახის უფლებადამცველები დღეს თეთრიწყაროს ტყეში მიმავალი გზის შესწავლას დაიწყებენ იმის დასადგენად, თუ როგორ მოხვდა აღნიშნულ ტერიტორიაზე თამარ ბაჩალიაშვილის მანქანა.
„როდესაც პროკურატურას დავტოვებთ, მივდივართ იმ ტერიტორიაზე. ასევე იქნებიან ოჯახის წევრები და მოხალისეები, ვისაც სურვილი ექნება, რომ დაგვეხმაროს, შევისწავლით ყველა საეჭვო ადგილს, შესაძლებელია იყო თუ არა ვიდეო სათვალთვალო კამერებისთვის გვერდი აევლოთ და ისე გადაეადგილებინათ მანქანა“,- განაცხადა ქობესაშვილმა.
შეგახსენებთ, რომ თამარ ბაჩალიაშვილი 18 ივლისს გაუჩინარდა. ის 5-დღიანი ძებნის შემდეგ თეთრიწყაროს ტყესთან, საკუთარ მანქანაში გარდაცვლილი იპოვეს. ბაჩალიაშვილის საქმეზე გამოძიება თავისუფლების უკანონო აღკვეთის მუხლით დაიწყო, შემდეგ კი ბრალდების კვალიფიკაციას თვითმკვლელობამდე მიყვანის მუხლი დაემატა.
