„ნათია თურნავა არის ჩაფლავებული „ქართული ოცნების“ გუნდის ერთ-ერთი ყველაზე ჩაფლავებული მინისტრი“, - ამის შესახებ „ევროპული საქართველოს“ ერთ-ერთმა ლიდერმა, სერგი კაპანემ განაცხადა, რითაც გამოეხმაურა ეკონომიკის მინისტრის, ნათია თურნავას პარლამენტში ინტერპელაციის წესით გამოცხადებას.
კაპანძის თქმით, დღეს „ევროპულ საქართველოს“ თურნავასთან ქვეყანაში არსებულ ეკონომიკურ მდგომარეობაზე კონკრეტული კითხვები ექნება.
„ევროპული საქართველოს“ გუნდმა დღეს პარლამენტში დაიბარა ეკონომიკის მინისტრი. მასთან გვაქვს კონკრეტული კითხვები. ნათია თურნავა არის ჩაფლავებული „ქართული ოცნების“ გუნდის ერთ-ერთი ყველაზე ჩაფლავებული მინისტრი. ჩვენი კითხვები ეხება მის მენეჯმენტს და ჩავარდნილ ზომებს, რომლებიც მათ მიიღეს კოვიდთან დაკავშირებით და შეწირეს ეკონომიკა, ასევე კითხვები ეხება იმ ძალიან მძიმე დილემას, რომლის წინაშეც ჩვენ დღეს აღმოვჩნდით ყველანი, როდესაც ერთი მხრივ, ეკონომიკა განადგურებულია და მეორე მხრივ, ისევ გვაქვს ინფიცირებული ადამიანების მატება. ჩვენი კითხვები ეხება იმ უმძიმეს ეკონომიკურ კრიზისს, რომელშიც ამ ჩაფლავებულმა გუნდმა შეიყვანა ქვეყანა. დღეს გამოჩნდება რატომ უნდა შეიცვალოს „ქართული ოცნება“, რატომ უნდა შეიცვალოს ეს ჩაფლავებული გუნდი და რატომ უნდა მოხდეს ისეთი ცვლილებები, რომლებიც ქვეყანას წაიყვანს წინ“, - აღნიშნა კაპანძემ.
ცნობისთვის, დღეს პარლამენტში ეკონომიკისა და მდგრადი განვითარების მინისტრს, ნათია თურნავას ელოდებიან. მინისტრი პლენარულ სხდომაზე ინტერპელაციის წესით წარდგება.