„ევროპული საქართველოს“ ქუთაისის მაჟორიტარობის კანდიდატი, ოთარ კახიძე, შინაგან საქმეთა მინისტრის, ვახტანგ გომელაურის განცხადებას ეხმაურება, რომელმაც განაცხადა, რომ ქვეყანაში კრიმინალი მომატებული არ არის.

ოთარ კახიძის თქმით, მინისტრი უტიფრად ცდილობს, შეცდომაში შეიყვანოს საზოგადოება.

„შინაგან საქმეთა მინისტრს მე ვურჩევ, ჩაიხედოს საკუთარი უწყების ოფიციალურ სტატისტიკაში და იქ ნახავს, რომ დანაშაული სიცოცხლის წინააღმდეგ, 900 შემთხვევიდან გაიზარდა 2300 შემთხვევამდე. დანაშაული ჯანმრთელობის წინააღმდეგ, 4600 - დან გაიზარდა 11 000-მდე. დანაშაული საკუთრების წინააღმდეგ, 13 000 - დან გაიზარდა 25 000 -მდე. ეს წერია პოლიციის ოფიციალურ სტატისტიკაში და შინაგან საქმეთა მინისტრმა საზოგადოება ასე უტიფრად არ უნდა შეიყვანოს შეცდომაში.

„ევროპული საქართველო“ გარდამტეხ ცვლილებებს მოუტანს ქვეყანას, 31 ოქტომბრის შემდგომ, როდესაც ჩვენ შევამცირებთ კრიმინალს და ასეთი სახის ტყუილებს აღარ ვაკადრებთ საზოგადოებას”, -განაცხადა ოთარ კახიძემ.