ვიღებ ბატონი რომან კაკულიას გამოწვევას და ვეპატიჟები მას სატელევიზიო დებატებში. ადგილი და დრო თავად შეარჩიოს, - ამის შესახებ „ლელოს" ერთ-ერთმა ლიდერმა და გლდანის მაჟორიტარი დეპუტატობის კანდიდატმა, გიგლა მიქაუტაძემ განაცხადა.

„ვთავაზობ მას ვისაუბროთ არა მხოლოდ „ლელოს" პროგრამაზე, არამედ „ქართული ოცნების“ გეგმაზეც, თუ ასეთი არსებობს ბუნებაში. მე ყოველდღე ვხვდები სასოწარკვეთილ ადამიანებს გლდანის რაიონში, რომლებიც ვერ გრძნობენ ხელისუფლების არსებობას ქვეყანაში. მათ არავინ სცემს პასუხს კატასტროფულად გაუფასურებულ ლარზე და სესხებზე, რომლის გადახდის ვალდებულება თვის ბოლოს დაუდგებათ. ხელისუფლებამ, ეროვნულ ბანკთან ერთად, უნდა შექმნას სავალუტო დერეფანი - ლარის კურსის ქვედა და ზედა დროებითი ზღვარი, რომელიც დაასტაბილურებს ეროვნულ ვალუტას და ჩააქრობს პანიკას. მან ასევე უნდა შეიმუშაოს სესხების რეფინანსირების ახალი მექანიზმი, რათა მოხდეს ძველი სესხების ახლით გადაფარვა და 6 თვიანი საშეღავათო პერიოდის დაწესება. თუ „ქართულ ოცნებას“ არ მოგწონთ „ლელოს“ მოდელი, წარმოგვიდგინეთ თქვენი ვერსია. უთხარით ხალხს, რას აპირებთ მათი მდგომაროების გასაუმჯობესებლად. გაეცით არა ჩემს, არამედ ჩვენი თანამოქალაქეების კითხვებს პასუხი", - განაცხადა გიგლა მიქაუტაძემ.

აღნიშნულ ინფორმაციას „ლელოს“ პრესსამსახური ავრცელებს.