არჩილ თალაკვაძის განცხადებით, არ არსებობს არანაირი ლოგიკა, რატომ შეიძლება იყო დაინტერესებული მმართველი პარტია ინციდენტების არსებობით, იმ პირობებში, როდესაც კვლევები მათ მიმართ 56%-იან მხარდაჭრას აჩვენებს. ამის შესახებ პარლამენტის თავმჯდომარემ ვირტუალურ პრესკონფერენციაზე განაცხადა, რომელზეც არჩევნებში კეთილსინდისიერი მონაწილეობის შესახებ დათქმის პრეზენტაცია გაიმართა. მისივე თქმით, გუშინ მარნეულში მომხდარი ინციდენტისას სამართალდამცველებმა მყისიერი რეაგირება მოახდინეს.
„ჩვენ გვაქვს პოზიტიური კამპანია, რომლის ფარგლებშიც საზოგადოებას წარვუდგენთ ჩვენს ლიდერებს, გვაქვს ძლიერი პროგრამა, რომელიც მოიცავს ეკონომიკურ ზრდას, პანდემიის შედეგების დაძლევას, გარემოს დაცვას, სასამართლო სისტემას, ასე რომ, ვერ ვხედავ ვერანაირ ლოგიკას თუ რატომ შეიძლება იყოს დაინტრესებული მმართველი პარტია საარჩევნო კამპანიების დროს ინციდენტების არსებობით. გარწმუნებთ, რომ სამართალდამცველების მხრიდან გუშინდელ ინციდენტზე რეაგირება დაუყოვნებლივი იყო, ჩვენ აქტიურად მივადევნებთ თვალს, რომ ამ შემთხვევების გამოძიება მოხდეს, რადგან ძალადობას არ აქვს ადგილი და არ აქვს პოლიტიკური გავლენა. რა თქმა უნდა, ჩვენ, როგორც მმართველი პარტია, მოწოდებული ვართ, რომ შევინარჩუნოთ პოზიტიური, კონსტრუქციული, მშვიდობიანი და თავისუფალი საარჩევნო კამპანია. ხელისუფლება აკეთებს ყველაფერს, რათა უზრუნვეყოს უსაფრთხო გარემო ნებისმიერი პოლიტიკური პარტიისთვის, რომელიც გეგმავს კამპანიას. მსურს დაგარწმუნოთ, რომ არავის ექნება შანსი, რომ ჩრდილი მიაყენოს საქართველოს დემოკრატიულ არჩევნებს, განსაკუთრებით ახლა, როდესაც ქვეყანა გადადის არსებითად პროპორციულ სისტემაზე,“- განაცხადა არჩილ თალაკვაძემ.
მისივე თქმით, მმართველი გუნდი დაინტერესებულია, რომ რაც შეიძლება დიდი საერთაშორისო წარმომადგენლობა იყოს საქართველოში არჩევნებისთვის.