ევროკავშირმა ანექსირებულ ყირიმში სარკინიგზო ხიდის მშენებლობაში მონაწილეობისთვის სანქციები დამატებით კომპანიებსა და პიროვნებებს დაუწესა.

სანქციები რუსეთის კიდევ ორ მოქალაქესა და ოთხ ორგანიზაციას შეეხება.

შესაბამისი გადაწყვეტილება ევროკავშირის საბჭომ მიიღო და უკრაინის ტერიტორიული მთლიანობის, სუვერენიტეტისა და დამოუკიდებლობის შემლახავი ან საფრთხის შემცველი ქმედებების შემზღუდველი ზომების შესახებ რეგულაციების შესაბამის დოკუმენტში ასახა.

დოკუმენტის თანახმად, ევროკავშირი არ ცნობს ყირიმისა და სევასტოპოლის უკანონო ანექსიას რუსეთის ფედერაციის მიერ, ხოლო ხიდისა და სარკინიგზო ლიანდაგების მშენებლობა, რომელიც მას ადრე არსებულ სატრანსპორტო ინფრასტრუქტურასთან აკავშირებს, მიზნად ისახავს რუსეთის ფედერაციის კონტროლის გაძლიერებას არალეგალურად ანექსირებულ ყირიმსა და სევასტოპოლზე და ნახევარკუნძულის შემდგომ იზოლირებას უკრაინისგან.

ცნობისთვის, ევროკავშირმა სანქციები 2018 წელს 6 რუსულ კომპანიას დაუწესა, რომლებიც რუსეთის და მის მიერ ანექსირებული ყირიმის დამაკავშირებელი ხიდის მშენებლობაში მონაწილეობდნენ. შეგახსენებთ, რუსეთის პრეზიდენტმა, ვლადიმერ პუტინმა ყირიმის მიმართულებით 19 კილომეტრიანი სარკინიგზო ხიდი 2019 წლის დეკემბერში გახსნა.