პარტია „ქართული ოცნება - დმეოკრატიული საქართველოს“ აღმასრულებელი მდივანის ირაკლი კობახიძის განცხადებით, დანიაში საქართველოს ელჩის გიგი გიგიაძის მხრიდან დიპლომატიური საქმიანობის სტანდარტები დაირღვა.

მისივე თქმით, გიგი გიგიაძეს საგარეო საქმეთა სამინისტროსთან კომუნიკაცია დავით გარეჯის საკითხზე არ ჰქონია.

„როდესაც ელჩი ასეთ განცხადებას აკეთებს, მინიმუმ მისი მხრიდან გადამოწმებული უნდა იყოს ფაქტები და მეორე - კომუნიკაცია უნდა შედგეს საგარეო საქმეთა სამინისტროს ხელმძღვანელობასთან. ეს ყველაფერი, როგორც ვიცით, არ გაკეთებულა და აქედან გამომდინარე უხეშად დაირღვა დიპლომატიური საქმიანობის სტანდარტები“, - განაცხადა ირაკლი კობახიძემ.

ცნობისთვის, საქართველოს საგანგებო და სრულუფლებიანი ელჩი დანიაში, გიგი გიგიაძე დავით გარეჯის საქმეზე დაკავებულ, საქართველო - აზერბაიჯანის დელიმიტაცია - დემარკაციის კომისიის ყოფილ თავმჯდომარეს, ივერი მელაშვილს მხარდაჭერას უცხადებს. როგორც გიგიაძე აღნიშნავს, ივერი მელაშვილი გამორჩეული პატრიოტი და პროფესიონალი ექსპერტია.

„სრულ მხარდაჭერას ვუცხადებ ივერი მელაშვილს, რომელსაც პირადად ვიცნობ 1997 წლიდან და მიმაჩნია, რომ ის არის საკუთარი ქვეყნის, საქართველოს გამორჩეული პატრიოტი, ჩვენი სახელმწიფო საზღვრის დელიმიტაცია-დემარკაციის პროცესის პროფესიონალი და შეუცვლელი ექსპერტი. წარდგენილი ბრალდება იმდენად აბსურდული და საღ აზრს მოკლებულია, რომ ამაზე კომენტარის გაკეთებაც მიჭირს. იმედს ვიტოვებ, რომ ეს დაწყებული გამოძიება ყველა არსებულ კითხვას ამომწურავ პასუხს გასცემს და სრულიად უდანაშაულო, თავის ქვეყანაზე შეყვარებული ადამიანი მალევე გათავისუფლდება”, - წერს გიგი გიგიაძე სოციალურ ქსელში.