საფრანგეთისა და რუსეთის პრეზიდენტებმა მთიან ყარაბაღში არსებული ვითარება განიხილეს. კრემლის ინფორმაციით, ვლადიმერ პუტინსა და ემანუელ მაკრონს შორის სატელეფონო საუბარი საფრანგეთის მხარის ინიციატივით შედგა.
კრემლის ცნობით, მხარეებმა დეტალურად განიხილეს მთიანი ყარაბაღის კონფლიქტის ზონაში მიმდინარე სიტუაცია.
მაკრონს ვლადიმერ პუტინმა ის ნაბიჯები გააცნო, რომლებიც გადაიდგა საბრძოლო მოქმედების შემდგომი ესკალაციის თავიდან ასაცილებლად. ხაზი გაესვა 10 და 17 ოქტომბერს ცეცხლის შეწყვეტის შესახებ მიღწეული შეთანხმებების დაცვის მნიშვნელობას.
მხარეებმა მზადყოფნა გამოთქვეს გაგრძელდეს საფრანგეთისა და რუსეთის მჭიდრო კოორდინაცია როგორც ეუთო-ს მინსკის ჯგუფის თანათავმჯდომარეობის, ასევე გაერო-ს უშიშროების საბჭოს ფარგლებში.