ამგვარი ფაქტის დაშვება ყველა მოქალაქეს საფრთხის ქვეშ აგდებს, რადგან მსგავს დანაშაულს ახალისებს, - ამ განცხადებით „ევროპული საქართველოს“ ქუთაისის მაჟორიტარობის კანდიდატმა, ოთარ კახიძემ ზუგდიდის მოვლენებზე შინაგან საქმეთა მინისტრის განცხადებას უპასუხა. მისივე თქმით, მინისტრის განცხადება, რომ ოპერაცია წარმატებული იყო, წარმოუდგენელი განცხადებაა.

„გუშინ შს მინისტრმა წარმოუდგენელი რამ თქვა - ყაჩაღის მოთხოვნების დაკმაყოფილება ყოფილა თურმე წარმატებული ოპერაცია და 10 მილიონი იქნება თუ 100 მილიონი, მივცემთ ყველას, არ არის პრობლემაო... დაუშვებელია, კრიმინალებს გაუვიდეთ ხელყუმბარით სადმე შევარდნა, მძევლების აყვანა და შემდეგ სახელმწიფოსთვის ფულის გამოძალვა. ამგვარი ფაქტის დაშვება ყველა მოქალაქეს საფრთხის ქვეშ აგდებს, რადგან მსგავს დანაშაულს ახალისებს! ასეთი ელემენტარული რამ ვისაც არ ესმის, როგორ შეიძლება შს მინისტრის თანამდებობას იკავებდეს? ქვეყანა ასეთი მავნებლების მართვის ქვეშაა. იმედია, ცოტა ხანი დარჩა ამ კატასტროფისა და მარაზმის დასრულებამდე,“ - განაცხადა კახიძემ. აღნიშნულ კომენტარს „ევროპული საქართველოს“ პრესსამსახური ავრცელებს.