პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილი სამარცხვინოს და სასაცილოს უწოდებს „ევროპული საქართველოს“ ერთ-ერთი ლიდერის, გიგი უგულავას განცხადებას, რომ „თუ ტერორისტი მიიღებს იმას, რაც სურს, ეს მსგავსი ქმედებების წახალისებაა“.

როგორც სესიაშვილმა ტელეკომპანია „პალიტრანიუსის“ გადაცემა „დღის ნიუსრუმში“ განაცხადა, უგულავას სურს, რომ მოსახლეობას დაუცველობის განცდა გაუჩნდეს.

„პოპულისტი უგულავას განცხადება სამარცხვინო და სასაცილოა იმიტომ, რომ რასაც ამბობს, რომ შეიძლება ამ ყველაფერს მოჰყვეს ჯაჭვითი რეაქცია, არის მისი სურვილი, რომ ქვეყანაში იყოს დაძაბული სიტუაცია და მოსახლეობას ჰქონდეს დაუცველობის განცდა. ჯერ ერთი, ამ პირს დავაკავებთ და შესაბამისი პასუხისმგებლობა დაეკისრება, ნუ ჩქარობს და ნუ აქვს იმის იმედები, რომ ჩვენს მოსახლეობას დაუცველობის განცდა დაეუფლება. პირველ რიგში, მინდა საზოგადოებას ავუხსნა, რომ ქვეყანას აქვს ძალიან ძლიერი უსაფრთოების სისტემა, მათ შორის თანამედროვე ტექნიკური საშუალებები, ამიტომ ნებისმიერ ასეთ შემთხვევაში, ხელისუფლება იმოქმედებს ადეკვატურად. პრიორიტეტი არის ადამიანის სიცოცხლე და ჯანმრთელობა, თუმცა ვერცერთი დამნაშავე მართლმსაჯულებას ვერ დაემალება. გიგი უგულავას თავისი პოპულისტური სიტყვები დარჩება არჩევნების შემდეგ ცარიელ პოლიტიკურ ველზე“, - განაცხადა სესიაშვილმა.

ცნობისთვის, გიგი უგულავას განცხადებით, თუ ტერორისტი მიიღებს იმას, რაც სურს, ეს არის მსგავსი ქმედებების წახალისება და “მწვანე შუქის” ანთება. მისივე თქმით, ზუგდიდში ჩატარებული სპეცოპერაციის წარმატებაზე საუბარი არის უსინდისობა და ხელისუფლების სრული არაადეკვატურობის მაჩვენებელი.