თავდაცვის სამინისტროს პირადი შემადგენლობის სპეც-დანიშნულების კურსდამთავრებულებმა ფიცი დადეს. როგორც “ინტერპრესნიუსს” ვეტერანების საქმეთა სახელმწიფო სამსახურიდან აცნობეს, ფიცის დადების ცერემონიალს ვეტერანების საქმეთა სახელმწიფო სამსახურის დირექტორი, გენერალი კობა კობალაძე ესწრებოდა.

მათი ცნობით, კობალაძემ თავდაცვის სამინისტროს მადლობა გადაუხადა იმ უმნიშვნელოვანესი ძალისხმევისთვის, რასაც უწყება, ქვეყნისთვის ამ რთულ ვითარებაში, ქვეყნის უსაფრთხოების, თავდაცვისუნარიანობასა და ღირსეული ოფიცრების აღზრდაში დებს. მან კურსდამთავრებულებს მიულოცა და სიტყვით მიმართა.

„დღეს თქვენ ფიცით შეეკარით ჩვენს სამშობლოს. დღეიდან თქვენ ხართ პასუხისმგებლები ღვთისა და ქვეყნის წინაშე, რომ ღირსეულად ატარებთ არა მარტო მუნდირს, არამედ ქვეყნის მეომრისა და ჯარისკაცის სახელს. მე მინდა მადლობა გადავუხადო თითოეულ იმ ადამიანს, ვინც ორგანიზებით, შემართებით, პროფესიონალიზმით, მოგცათ იმის საშუალება, რომ ისწავლოთ და დაეუფლოთ იმ პროფესიას, რომელსაც ჰქვია ღირსეული ქვეყნის, პირველ რიგში ჯარისკაცი, შემდეგ ოფიცერი და თუ ღმერთმა ინება და შემართება გქონდათ, იყოთ ძლიერი და თავისუფალი საქართველოს ძლიერი ჯარისკაცი. მე მინდა, თითოეულ თქვენგანს კიდევ ერთხელ გადავუხადო მადლობა იმისთვის, რომ მიუხედავად ყოველი სირთულისა, გადაწყვიტა, აერჩია ცხოვრების არა მსუბუქი, არა იოლი გზა, არამედ ყველაზე ღირსეული სამსახური, რაც საკუთარი ქვეყნის, საკუთარი სამშობლოს, ხალხის სამსახურში გამოიხატება. წარმატებით გატაროთ ღმერთმა! თქვენ ხართ ჩვენი გმირი წინაპრების, ჩვენი გმირი თანამებრძოლების ღირსეული შთამომავლები! ღმერთი იყოს თქვენი, ჩვენი და ჩვენი ქვეყნის მფარველი”,- განაცხადა კობალაძემ.

ვეტერანების საქმეთა სამსახურის ინფორმაციით, კურსდამთავრებულთა შორის, გენერალ კობა კობალაძის ვაჟი, თენგიზ კობალაძეც არის და “მიუხედავად იმისა, რომ მან საერთაშორისო ურთიერთობების ფაკულტეტი დაამთავრა, გადაწყვიტა, თავისი ხედვა და პოტენციალი, ქვეყნის თავდაცვისუნარიანობის ამაღლებას, ქვეყნის ერთიანობისთვის ბრძოლას მოახმაროს”.