„საქართველოს ბანკის“ მძარცველი კი არ გაგვექცა, პოლიციამ 43 მძევლის სიცოცხლე გადაარჩინა, - ამის შესახებ პარტია “ქართული ოცნების“ აღმასრულებელმა მდივანმა ირაკლი კობახიძემ “პალიტრანიუსის“ გადაცემა “360 გრადუსში“ განაცხადა, სადაც ზუგდიდში, „საქართველოს ბანკზე“ განხორციელებული თავდასხმის ფაქტს გამოეხმაურა.

ირაკლი კობახიძის თქმით, „საქართველოს ბანკზე“ თავდამსხმელს აუცილებლად დააკავებენ.

"საქართველოს ბანკის“ მძარცველი კი არ გაგვექცა, 43 მძევლის სიცოცხლე გადაარჩინა პოლიციამ. ეს არის რეალობა. „გაგვექცა“ სხვა რამეა. პირველი ეტაპი წარმატებით დასრულდა, მეორე დანაშაულის გახსნაც დასრულდა წარმატებით და ესეც არის შს სამინისტროს ეფექტიანობის შედეგი. მესამე ფაზაც ძალიან მალე დასრულდება. გაგვექცა არასწორი სიტყვაა.

სპეცოპერაცია ჩატარდა არსებული სახით, იმის გამო, რომ არცერთი ადამიანი არ დაღუპულიყო. ოპერაცია გრძელდება და ეს პირი აუცილებლად იქნება დაკავებული. გაგვექცა არასწორია, გაუშვეს იმ კონკრეტულ მომენტში“, - განაცხადა ირაკლი კობახიძემ.

შეგახსენებთ, შინაგან საქმეთა სამინისტროს ინფორმაციით, ზუგდიდში, „საქართველოს ბანკის“ ფილიალზე მომხდარი თავდასხმა ბადრი ესებუამ განახორციელა. გამოძიება საქართველოს სისხლის სამართლის კოდექსის 236-ე, 323-ე და 329-ე მუხლებით მიმდინარეობს, რაც ტერორისტულ აქტს, მძევლად ხელში ჩაგდებას ტერორისტული მიზნით და ცეცხლსასროლი იარაღის უკანონოდ შეძენა-შენახვა-ტარებას გულისხმობს.