პარლამენტთან აქციაზე დაპირისპირებაა. ერთმანეთს აქციის მონაწილეები და სამართალდამცავები დაუპირისპირდნენ.

აქციის მონაწილეები პარლამენტის წინ კარვების გაშლას აპირებდნენ, რათა ღამე რუსთაველის გამზირზე გაეტარებინათ, თუმცა პოლიციამ მათ ამის საშუალება არ მისცა. აქციის მონაწილეებსა და სამართალდამცავებს შორის დაპირისპირების მიზეზი სწორედ ეს გახდა.

„მშვიდობიანად ვაპირებდით კარავი გაგვეშალა, მაგრამ ქურდულად, ზონდერებივით შემოგვეპარნენ პოლიციელები და კარავი წაიღეს. ვპირდებით ამ პოლიციელებს, რომლებიც ასეთ სამარცხვინო საქციელს ჩადიან, რომ მათ მუნდირს ჩვენ აღვადგენთ", - განაცხადა აქციის ერთ-ერთმა მონაწილემ.

როგორც "ინტერპრესნიუსს" შსს-ში განუცხადეს, მომხდარ ფაქტზე აქციის არც ერთი მონაწილე არ დაუკავებიათ.