შინაგან საქმეთა სამინისტროს ინიციატივით, საქართველოში აკრედიტებული დიპლომატიური კორპუსის წარმომადგენლებთან შეხვედრა გაიმართა. უცხოელ დიპლომატებს მინისტრი ვახტანგ გომელაური მოადგილეებთან ერთად შეხვდა. ამის შესახებ ინფორმაციას შინაგან საქმეთა სამინისტრო ავრცელებს.

მათივე ცნობით, შსს-ში გამართულ შეხვედრაზე საელჩოებისა და საერთაშორისო ორგანიზაციების წარმომადგენლებს სამინისტროს მხრიდან პროაქტიულად მიეწოდათ ინფორმაცია 8 ნოემბერს, თბილისში, ცენტრალური საარჩევნო კომისიის შენობასთან გამართული აქციის მიმდინარეობის შესახებ.

როგორც სამინისტროში განმარტავენ, დიპლომატიური კორპუსის წარმომადგენლები შინაგან საქმეთა სამინისტროს მიერ განხორციელებული და დაგეგმილი პრევენციული ღონისძიებებით დაინტერესდნენ, რომლებიც მიმდინარე შეკრებებისა და საპროტესტო აქციების დროს საზოგადოებრივი წესრიგის დაცვას უკავშირდება. „აღნიშნულ საკითხზე დიპლომატებს დეტალური ინფორმაცია მიეწოდათ. შეხვედრის დასასრულს, მათი მხრიდან გამოითქვა მზაობა, შეკრებების დროს გამოვლენილი სამართალდარღვევებისა და მათზე პოლიციის რეაგირების შესახებ ინფორმაციის საერთაშორისო პარტნიორებისთვის პროაქტიულ რეჟიმში მიწოდების თაობაზე“, - ნათქვამია განცხადებაში.