გერმანიის კანცლერის ანგელა მერკელის განცხადებით, კორონავირუსის კრიზისი კვლავ მწვავეა, მიუხედავად ვაქცინის შექმნის შესახებ ბოლო დროს გაჟღერებული პოზიტიური სიახლისა.

მერკელის განცხადებით, მთავრობას მთელი ზამთრის განმავლობაში მოუწევს პანდემიასთან გამკლავება.

„როგორც ეს მოხდა ესპანური გრიპის შემთხვევაში, ახლაც ჩვენ ასევე უნდა ველოდოთ, რომ მეორე ტალღა უფრო მწვავე იქნება და ეს მოხდება წელიწადის ნაკლებად ხელსაყრელ პერიოდში, ზამთრის თვეებში, რაც ნიშნავს, რომ ამ საკითხს მთელი ზამთრის განმავლობაში უნდა გავუმკლავდეთ. მიუხედავად იმისა, რომ ვაქცინის შემუშავების შესახებ კარგი ამბებია, ამ ზამთარს ის რაიმე მნიშვნელოვან გავლენას არ მოახდენს, ამიტომ ჩვენ უნდა გავაგრძელოთ ჩვენი პრევენციული ზომები“, - განაცხადა მერკელმა ვიდეო კონფერენციის დროს.