წითელი ხაზი სადაც არის, იქ დარჩება - შანტაჟზე მოდიხარ, როდესაც ამბობ, „თუ არ დამთანხმდები კოვიდსაც გავავრცელებ, ეკონომიკურ პრობლემებსაც შევქმნი და ქვეყნის ინტერესებს დავაზიანებ“, - ამის შესახებ ოპოზიციურ პარტიებთან დაკავშირებით “ქართული ოცნების“ ერთ-ერთმა ლიდერმა გია ვოლსკიმ “პალიტრანიუსის“ გადაცემა “დღის ნიუსრუმში“ განაცხადა.
ამასთან, ვოლსკის ინფორმაციით, მოლაპარაკებების მესამე რაუნდისათვის “რაღაც თემები დამუშავებულია“, თუმცა მან დეტალებზე საუბრისგან თავი შეიკავა.
“საწყისი პოზიცია არის ასეთი - ოპოზიცია ამბობს, რომ არჩევნები გაყალბდა. ჩვენ ვამბობთ, რომ არ გაყალბებულა და თუ ვინმეს ეჭვი ეპარება გავხსნათ უბნები და ვიდეოთვალი. თუ ეჭვი გეპარებათ ვნახოთ, რას ამბობს აშშ, ევროკავშირის ქვეყნები, ეუთო/ოდირი, ევროსაბჭოს და ნატოს საპარლამენტო ასამბლეა. ეს არ აინტერესებთ! აქედან გამომდინარე, რას ელოდებიან, რომ ჩვენ ამაზე უარს ვიტყვით?! მიმდინარეობს ოპოზიციის სერიოზული ლუსტრაცია. ოპოზიციისათვის სერიოზული გამოწვევაა, რომ ასეთი ძლიერი მხარდაჭერა გამოხატა დასავლეთმა, ნატომ და სერიოზულ ფრუსტაციაში არიან. ახლა უნდათ იქეთ, ამ ბოსტნიდან იმ ბოსტანში გადაიტანონ“, - განაცხადა გია ვოლსკიმ.