ქვეყანაში მიმდინარე ოპოზიციის რამდენიმე კვირიან პროტესტს თელავშიც უერთდებიან. თეატრის წინ ორმა სამოქალაქო აქტივისტმა კარავი დადგა. ისინი არ ეთანხმებიან საპარლამენტო არჩევნებში „ქართული ოცნების“ გამარჯვებას და მოითხოვენ ვადამდელ არჩევნებს.

ოპოზიციური პარტიის მხარდამჭერებმა განმარტეს, რომ სამართალდამცველების მოთხოვნის მიუხედავად პროტესტის შეწყვეტას არც ღამით აპირებენ და ისინი კარავში დარჩებიან.

"გუშინ, როდესაც დავინახეთ, რომ თბილისში პროტესტის დროს დააკავეს ხალხი, ასე სპონტანურად ორმა ადამიანმა გადავწყვიტეთ კარვის გაშლა, თუმცა პოლიციამ გვითხრა, რომ ქალაქში დეზინფექცია ტარდებოდა და ტერიტორია უნდა დაგვეტოვებინა. ჩვენ ამ მიზეზით დავემორჩილეთ, მაგრამ ეს აღმოჩნდა ტყუილი. დღეს აღარ ვაპირებთ აქედან წასვლას, ვაგრძელებთ პროტესტს. ამ ფორმით მოვითხოვთ ვადამდელ არჩევნებს და საქართველოს ბიძინა ივანიშვილისგან გათავისუფლებას. ველოდებით სხვა მოქალაქეების მხარდაჭერასაც“, - აცხადებენ სამოქალაქო აქტივისტები.

მათ „ლეიბორისტული პარტიის“ კახეთის რეგიონალური ხელმძღვანელი ნიკა ვარდოშვილიც შეუერთდა.