პარტია „ქართული ოცნება- დემოკრატიული საქართველოს“ გენერალური მდივნის, კახა კალაძის განცხადებით, „ნაციონალური მოძრაობა“ მარგინალიზაციის გზას ადგას. კალაძის შეფასებით, სრული კატასტროფაა პარტიის ცალკეული ლიდერების მხრიდან ელჩების მისამართით გაკეთებული შეურაცხმყოფელი განცხადებები.
„ეს არის სრული კატასტროფა, რასაც ჩვენ ბოლო დღეების განმავლობაში ვისმენთ ამ კონკრეტული პოლიტიკური პარტიის წევრების მხრიდან გაკეთებულ განცხადებებს, შეტევებს ჩვენს საერთაშორისო და სტრატეგიულ პარტნიორებზე. ისინი ფიქრობენ, რომ ელჩის შეურაცხყოფა არის მხოლოდ პიროვნულად მისი შეურაცხყოფა. ეს არის, რა თქმა უნდა, სახელმწიფოების შეურაცხყოფა, რაც ძალიან ცუდია. მარგინალიზაციის გზა, რასაც „ნაციონალური მოძრაობა“ ადგას, ყველა ვხედავთ, სახეზეა. გადაწყვეტილება, რომელიც მიიღო გრიგოლ ვაშაძემ, ამასთან დაკავშირებით განმარტებებიც გააკეთა, თუ რა იყო ამის გამომწვევი მიზეზი. მე ნამდვილად ვერ ვუპასუხებ იმას, თუ რა ხდება „ნაციონალურ მოძრაობაში“, - განაცხადა კალაძემ.
რაც შეეხება ხელისუფლებასა და ოპოზიციას შორის მიმდინარე მოლაპარაკებებს, როგორც კალაძე აცხადებს, მასში მონაწილეობას „ყველა ჯანსაღად მოაზროვნე პარტია მიიღებს“.
„ჩვენ არაერთხელ განვაცხადეთ და არაერთხელ გავიმეორებ იმას, რომ არჩევნების ჩატარებასთან დაკავშირებით შეიქმნება საგამოძიებო კომისია. რა თქმა უნდა, გადამოწმდება ყველა ბიულეტენი. თუ 1%-იც კი იქნება ცდომილება ჩვენს სასარგებლოდ, ჩავატარებთ ვადამდელ არჩევნებს“, - განაცხადა კალაძემ.