ეგზიტპოლის მონაცემებით, ყაზახეთის საპარლამენტო არჩევნებში მმართველი პარტია – „ნურ ოთანი“ ლიდერობს, - ამის შესახებ ინფორმაციას ადგილობრივი მედია ავრცელებს.

მათივე ინფორმაციით, კვლევითი ინსტიტუტის „საზოგადოებრივი აზრის“ ეგზიტპოლის შედეგების მიხედვით, პარტია „ნურ ოთანმა“ ხმების თითქმის 72% მიიღო, პარტია „აკ ჟოლმა” - 10.18 %, „ყაზახეთის სახალხო პარტიას” ამომრჩეველთა 9.03 %-მა დაუჭირა მხარი, პარტია „აუილს“- 5.75%-მა, პარტია „ადალს“ კი- 3. 07%-მა.

წინასწარი მონაცემების მიხედვით, ყაზახეთის პარლამენტში სამი პარტია შევა.

ქვეყნის ცენტრალური საარჩევნო კომისიის განცხადების მიხედვით, 22:00 საათის მონაცემებით, არჩევნებზე ამომრჩეველთა აქტივობა 63.3 % იყო.

ყაზახეთში საპარლამენტო არჩევნები კვირას, საპროტესტო აქციების ფონზე ჩატარდა. ალმათის „რესპუბლიკის მოედანზე“ გამართული აქციის ორგანიზატორი ყაზახეთის დემოკრატიული პარტია იყო. შეკრებილი დემონსტრანტები სკანდირებდნენ „ბოიკოტი!“. საპროტესტო აქცია ალმათში, ასტანის მოედანზეც გაიმართა. გამოცემა „დოიჩე ველეს“ ინფორმაციით, საპროტესტო აქციებზე სამართალდამცავებმა სულ მცირე 30 ადამიანი დააკავა.