ერთადერთი ხავსი, რასაც ისინი ეჭიდებიან, არის ის, რომ საუბრობენ, თითქოს გუნდში დაპირისპირებაა - ამ საუბრებით სად მივიდნენ, საზოგადოება ხედავს, - ასე პასუხობს საქართველოს პარლამენტის თავმჯდომარე, არჩილ თალაკვაძე ოპონენტების განცხადებებს, რომ მმართველ გუნდში რამდენიმე დაპირისპირებული კლანია.

როგორც არჩილ თალაკვაძე ჟურნალისტებთან აღნიშნავს, ოპონენტების განცხადებები მიუთითებს, რომ მათ გეგმა არ აქვთ, არ აქვთ ხედვა, თუ როგორ უნდა გაწიონ ოპონირება.

„ეს პირდაპირ მიუთითებს ჩვენი ოპონენტების სისუსტეზე და იმაზე, რომ მათ მომავალი გეგმა არ აქვთ, არ აქვთ ხედვა, თუ როგორ უნდა იმუშაონ მომავალში, როგორ უნდა გასწიონ ოპონირება.

ამ შემთხვევაში, როდესაც შენ გეგმა არ გაქვს, არ გყავს ძლიერი გუნდი, როდესაც არჩევნებში დამარცხდი და მეორე მხრივ, ის მხარდაჭერაც უარყავი, რაც საზოგადოებამ მოგცა და არ შეხვედი პარლამენტში, ერთადერთი ხავსი, რასაც ისინი ეჭიდებიან, არის ის, რომ საუბრობენ, თითქოს, გუნდში არის დაპირისპირება. წლებია, რაც ამაზე საუბრობენ. ამ საუბრებით სად მივიდნენ, მგონი, საზოგადოება ხედავს.

რაც შეეხება გუნდს, გუნდი არის კონსოლიდირებული, როგორც არასდროს. არის განახლებული, ძალიან პროგრესული. გვაქვს მიზნები და ხედვა. ვიცით ჩვენს საზოგადოებასთან ერთად, რა საქმე გვაქვს გასაკეთებელი“, - აცხადებს თალაკვაძე.